ਨਾ ਬਾਲੀ ਉਮਰੇ ਵਿਆਹ

ਨਾ ਬਾਲੀ ਉਮਰੇ ਵਿਆਹ ਬਾਬਲਾ,
ਨਾ ਬਾਲੀ ਉਮਰੇ ਵਿਆਹ |

ਹਾਲੇ ਤਾਂ ਮੇਰੇ ਖੇਲਣ ਦੇ ਦਿਨ,
ਹਾਲੇ, ਤਾਂ ਮੇਰੇ ਮੱਲਨ ਦੇ ਦਿਨ |
ਨਾਲ ਸਹੇਲੀਆਂ ਘਰ-ਘਰ ਖੇਡਾਂ,
ਗੁਡੀਆਂ ਪਟੋਲੇ ਖੜੇ ਉਡੀਕਣ |
ਹਾਲੇ ਤਾਂ ਮੈਂ ਪੜਨਾ ਚਾਹੁੰਦੀ,
ਵਿਚ ਸਕੂਲੀ ਵੀਰਾ ਜੀਕਣ |
ਹਾਲੇ ਤਾਂ ਮੈਨੂ ਸੋਝ ਨਾ ਕੋਈ,
ਹਾਲੇ ਤਾਂ ਮੇਰੇ ਸਿਖਣ ਦੇ ਦਿਨ |
ਅਜੇ ਅਧੂਰੇ ਮੇਰੇ ਚਾਅ,
ਨਾ ਬਾਲੀ ਉਮਰੇ ਵਿਆਹ ਬਾਬਲਾ,
ਨਾ ਬਾਲੀ ਉਮਰੇ ਵਿਆਹ |

ਹਾਲੇ ਤਾਂ ਮੇਰੀ ਮੱਤ ਹੈ ਨਿੱਕੀ,
ਹਾਲੇ ਤਾਂ ਮੇਰੀ ਕੁਖ ਹੈ ਕੱਚੀ,
ਕਿਵੇਂ ਮੈਂ ਇਕ ਬਾਲ ਨੂੰ ਸਾਂਭਾਂ,
ਹਾਲੇ ਤਾਂ ਮੈਂ ਖੁਦ ਹਾਂ ਬੱਚੀ |
ਕਿਵੇਂ ਦਸ ਇਕ ਘਰ ਨੂੰ ਬੰਨਾਂ ,
ਬਣਕੇ ਮੈਂ ਇਕ ਸੁਗੜ੍ਹ ਸੱਚੀ |
ਕਿਵੇਂ ਦਸ ਇਹ ਦੁਖ ਸੁਖ ਸਮਝੇ,
ਅਜੇ ਅਨਜਾਣ ਹੈ ਤੇਰੀ ਬੱਚੀ |
ਕਰਦੀ ਹਾਂ ਬਸ ਇਹੀ ਦੁਆ,
ਨਾ ਬਾਲੀ ਉਮਰੇ ਵਿਆਹ ਬਾਬਲਾ,
ਨਾ ਬਾਲੀ ਉਮਰੇ ਵਿਆਹ |